baagh mein jaa kar dekh liyaa — Jameel Malik

ye manzar ye ruup anokhe sab shahkaar hamaare hain
ham ne apne khun-e-jigar se kyaa kyaa naqsh ubhaare hain

aap mein gum hain magar sab ki khabar rakhte hain
ghar mein baiThe hain zamaane pe nazar rakhte hain

ham to tamaam umr tiri hi adaa rahe
ye kyaa huaa ki phir bhi hamin bevafaa rahe

ham se koi taalluq-e-khaatir to hai use
vo yaar baa-vafaa na sahi bevafaa to hai

kaise the log jin ki zabaanon mein nuur thaa
ab to tamaam jhuuT hai sachchaaiyon mein bhi

us ki khamoshiyon mein nihaan kitnaa shor thaa
mujh se sivaa vo dard kaa khugar lagaa mujhe

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

kahaan milegi misaal meri sitamgari ki
ki main gulaabon ke zakhm kaanTon se si rahaa huun

dil ki aavaara-mizaaji kaa gilaa kyaa kiije
khaana-barbaad rahaa khaana-kharaabon mein rahaa

gul toD liyaa shaakh se ye kah ke khizaan ne
ye ek tabassum kaa gunahgaar huaa hai

rasman gale to milte hain ham 'iid par zarur
lekin dilon ke faasle hote nahin hain duur