ab ai khudaa inaayat-e-bejaa se faaeda — Josh Malihabadi

had hai apni taraf nahin main bhi
aur un ki taraf khudaai hai

vahaan se hai miri himmat ki ibtidaa vallaah
jo intihaa hai tire sabr aazmaane ki

haan aasmaan apni bulandi se hoshiyaar
ab sar uThaa rahe hain kisi aastaan se ham

ik na ik zulmat se jab vaabasta rahnaa hai to 'josh'
zindagi par saaya-e-zulf-e-pareshaan kyuun na ho

ham aise ahl-e-nazar ko subut-e-haq ke liye
agar rasul na hote to subh kaafi thi

naqsh-e-khayaal dil se miTaayaa nahin hanuz
be-dard main ne tujh ko bhulaayaa nahin hanuz

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

husn jalva dikhaa gayaa apnaa
ishq baiThaa rahaa udaas kahin

zamaane bhar ke gham yaa ik tiraa gham
ye gham hogaa to kitne gham na honge

kis ki sadaa fazaaon mein gunji hai chaar-su
kis ne mujhe pukaaraa hai bachpan ke naam se