tabassum ki sazaa kitni kaDi hai — Josh Malihabadi

had hai apni taraf nahin main bhi
aur un ki taraf khudaai hai

vahaan se hai miri himmat ki ibtidaa vallaah
jo intihaa hai tire sabr aazmaane ki

haan aasmaan apni bulandi se hoshiyaar
ab sar uThaa rahe hain kisi aastaan se ham

ik na ik zulmat se jab vaabasta rahnaa hai to 'josh'
zindagi par saaya-e-zulf-e-pareshaan kyuun na ho

ham aise ahl-e-nazar ko subut-e-haq ke liye
agar rasul na hote to subh kaafi thi

naqsh-e-khayaal dil se miTaayaa nahin hanuz
be-dard main ne tujh ko bhulaayaa nahin hanuz

kyon tasavvur mein ji rahaa huun main
jab haqiqat mein mar hi jaanaa hai

apni anaa ki aaj bhi taskin ham ne ki
ji bhar ke us ke husn ki tauhin ham ne ki

vo kuchh muskuraanaa vo kuchh jheinp jaanaa
javaani adaaein sikhaati hain kyaa kyaa

uThaayaa us ne biiDaa qatl kaa kuchh dil mein Thaanaa hai
chabaanaa paan kaa bhi khuun bahaane kaa bahaana hai

na aai baat tak bhi munh pe roab-e-husn-e-jaanaan se
hazaaron soch kar mazmun ham darbaar mein aae

abru aanchal mein dupaTTe ke chhupaanaa hai bajaa
turk kyaa myaan mein rakhte nahin talvaaron ko