gham-e-dauraan gham-e-jaanaan gham-e-uqbaa gham-e-duniyaa — Kanval Dibaivi

'kanval' khushi ki huaa karti hai yunhi takmil
gham-e-hayaat ke har bahr-e-be-karaan se guzar

hansi mein kaTti thiin raatein khushi mein din guzartaa thaa
'kanval' maazi kaa afsaana na tum bhule na ham bhule

jis ne buniyaad gulistaan ki kabhi Daali thi
us ko gulshan se guzarne nahin deti duniyaa

kuchh bujhi bujhi si hai anjuman na jaane kyuun
zindagi mein pinhaan hai ik chubhan na jaane kyuun

zindagi gum na dosti gum hai
ye haqiqat hai aadmi gum hai

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

husn jalva dikhaa gayaa apnaa
ishq baiThaa rahaa udaas kahin

thakan se chuur hai saaraa vajud ab meraa
main bojh itne ghamon kaa to Dho nahin saktaa

main hi ghamgin nahin tark-e-taalluq pe 'kamaal'
vo bhi naashaad thaa us ko bhi fasurda dekhaa