hudud-e-dil se jo guzraa vo jaan-levaa thaa — Khaleel Tanveer

parind unchi uDaanon ki dhun mein rahtaa hai
magar zamin ki hadon mein basar bhi kartaa hai

vo log apne aap mein kitne aziim the
jo apne dushmanon se bhi nafrat na kar sake

auron ki buraai ko na dekhun vo nazar de
haan apni buraai ko parakhne kaa hunar de

rusvaa hue zalil hue dar-ba-dar hue
haq baat lab pe aai to ham be-hunar hue

parind shaakh pe tanhaa udaas baiThaa hai
uDaan bhuul gayaa muddaton ki bandish mein

main kyaa huun kaun huun kyaa chiiz mujh mein muzmar hai
kai hijaab uThaae magar hijaab mein huun

main baDaa ho gayaa huun magar bachpanaa
mere dil se kabhi bhi gayaa hi nahin

'saif' andaaz-e-bayaan rang badal detaa hai
varna duniyaa mein koi baat nai baat nahin

is qadar aap ke badle hue tevar hain ki main
apni hi chiiz uThaate hue Dar jaataa huun

jab se makaan badal gaiin donon paDosanein
lagtaa nahin hai ji miraa ujDe dayaar mein

kaifiyat ke ishaare pe tasvir mein chand rangon ki tartib badli gai
aasmaan zard hai aur zamin nilgun chand kaale shajar ik hari raat hai

hanste hanste ho gayaa barbaad main
khush-dili aisi bhi hoti hai bhalaa