shaam ke tiir se zakhmi hai 'khurshid' kaa siina — Khursheed Akbar

ai shahr-e-sitam-zaad tiri umr baDi ho
kuchh aur bataa naql-e-makaani ke alaava

aate aate aaegi duniyaa-daari
jaate jaate faaqa-masti jaaegi

ghaib kaa aisaa parinda hai zamin par insaan
aasmaanon ko jo shah-par pe uThaae hue hai

ham bhi tire beTe hain zaraa dekh hamein bhi
ai khaak-e-vatan tujh se shikaayat nahin karte

baDi bholi hai kharchili zarurat
shahanshaahi kamaai maangti hai

gharibi kaaTnaa aasaan nahin hai
vo saari umr patthar kaaTtaa hai

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

maarka garm to ho lene do khun-rezi kaa
pahle shamshir ke niche hamin jaa baiTheinge

ghazal mein jab talak ehsaas ki shiddat na ho shaamil
faqat alfaaz ki kaarigari mahsus hoti hai

charaag chaand shafaq shaam phuul jhiil sabaa
churaain sab ne hi kuchh kuchh shabaahatein teri

ham kisi aur vaqt ke hain asiir
subh ke shaam ke rahe hi nahin

shaam Dhale ye soch ke baiThe ham apni tasvir ke paas
saari ghazlein baiThi hongi apne apne miir ke paas