koi bhi yaqin dil ko 'shaad' kar nahin saktaa — Khushbir Singh Shaad

bhanvar jab bhi kisi majbur kashti ko Dubotaa hai
to apni bebasi par duur se saahil taDaptaa hai

ye teraa taaj nahin hai hamaari pagDi hai
ye sar ke saath hi utregi sar kaa hissa hai

'shaad' itni baDh gai hain mere dil ki vahshatein
ab junun mein dasht aur ghar ek jaise ho gae

yahi qatre banaate hain kabhi to ghaas par moti
kabhi shabnam ko ye simaab mein tabdil karte hain

rafta rafta sab tasvirein dhundli hone lagti hain
kitne chehre ek puraane album mein mar jaate hain

ab andheron mein jo ham khauf-zada baiThe hain
kyaa kahein khud hi charaaghon ko bujhaa baiThe hain

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

shiddat-e-gham se har ik kutte ko tap chaDhne lagaa
bole ab insaan hamaari ham-sari karne lagaa

aaj phir dab gaiin dard ki siskiyaan
aaj phir gunjtaa qahqaha rah gayaa

phir miri aas baDhaa kar mujhe maayus na kar
haasil-e-gham ko khudaa-raa gham-e-haasil na banaa