gham ko ehsaas ki miTTi mein khudaa ne gundhaa — Latif Shah Shahid

khud apne aap se rahtaa hai aadmi naaraaz
udaasiyon ke bhi apne mizaaj hote hain

mujh se to koi taaj-mahal bhi na ban sakaa
be-naam dil ki qabr mein dafnaa diyaa tujhe

chhiDkaa gayaa hai zahr fazaaon mein is tarah
maaon ne apni kokh se buDhe janam diye

gardish-e-ayyaam se chalti hai nabz-e-kaaenaat
vaqt kaa pahiya rukaa to zindagi ruk jaaegi

taaza havaa kharidne aate hain gaanv mein
'shaahid' shahar ke log bhi kaise ajiib hain

ye aur baat ki tu do qadam pe bhuul gayaa
hamein to hashr talak teraa intizaar rahaa

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

jaan sadqe ek bose par kareinge umr-bhar
dekh lo munh se milaa kar munh hamaaraa jhuuT sach

abr-e-bahaar ab bhi jachtaa nahin nazar mein
kuchh aansuon ke qatre ab bhi hain chashm-e-tar mein

saaf qulqul se sadaa aati hai aamin aamin
apne saaqi ko jo ham rind duaa dete hain