jaan sadqe ek bose par kareinge umr-bhar — Imdad Ali Bahr

qaazi ko jo rind kuchh chaTaa dein
masjid ki baghal mein mai-kada ho

khush raho yaar agar ham se ho bezaar bahut
dil agar apnaa salaamat hai to dildaar bahut

mire qatl par tum ne biiDaa uThaayaa
mire haath kaa paan khaayaa to hotaa

ham na kahte the hansi achchhi nahin
aa gai aakhir rukaavaT dekhiye

mire baghair na ik-dam use qaraar aataa
zaraa bhi zabt jo mujh be-qaraar mein hotaa

sau fasaad ek ishq mein uTThe
boyaa ik tukhm uge hazaar darakht

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

na udaas ho na malaal kar kisi baat kaa na khayaal kar
kai saal baa'd mile hain ham tere naam aaj ki shaam hai

bahut khaamosh rah kar jo sadaaein mujh ko detaa thaa
baDe sundar se jazbon ki qabaaein mujh ko detaa thaa

anjaam khushi kaa duniyaa mein sach kahte ho gham hotaa hai
saabit hai gul aur shabnam se jo hanstaa hai vo rotaa hai