jahaan jo thaa vahin rahnaa thaa us ko — Liaqat Jafri

main dauD dauD ke khud ko pakaD ke laataa huun
tumhaare ishq ne bachchaa banaa diyaa hai mujhe

main bahut jald lauT aaungaa
tum miraa intizaar mat karnaa

mire qabile mein taalim kaa rivaaj na thaa
mire buzurg magar takhtiyaan banaate the

meri jaanib na baDhnaa ab mohabbat
main ab pahle se mushkil raastaa huun

vajud apnaa hai aur aap tai kareinge ham
kahaan pe honaa hai ham ko kahaan nahin honaa

ishq tu ne baDaa nuqsaan kiyaa hai meraa
main to us shakhs se nafrat bhi nahin kar saktaa

kabhi khauf thaa tire hijr kaa kabhi aarzu ke zavaal kaa
rahaa hijr-o-vasl ke darmiyaan tujhe kho sakaa na main paa sakaa

mat dekh ki phirtaa huun tire hijr mein zinda
ye puchh ki jiine mein maza hai ki nahin hai

is balaa ko to khudaa jald kare shahr-badar
kaale paani ko ravaana shab-e-hijraan ho jaae

siine ke zor se bhi mu bhar nahin ukasti
in rozon hijr ki sil ye bhaari ho gai hai

raat thaa vasl aaj hijr kaa din
kuchh zamaane kaa e'tibaar nahin

use khabar thi ki ham visaal aur hijr ik saath chaahte hain
to us ne aadhaa ujaaD rakkhaa hai aur aadhaa banaa diyaa hai