main dauD dauD ke khud ko pakaD ke laataa huun — Liaqat Jafri

main bahut jald lauT aaungaa
tum miraa intizaar mat karnaa

mire qabile mein taalim kaa rivaaj na thaa
mire buzurg magar takhtiyaan banaate the

jahaan jo thaa vahin rahnaa thaa us ko
magar ye log hijrat kar rahe hain

meri jaanib na baDhnaa ab mohabbat
main ab pahle se mushkil raastaa huun

vajud apnaa hai aur aap tai kareinge ham
kahaan pe honaa hai ham ko kahaan nahin honaa

ishq tu ne baDaa nuqsaan kiyaa hai meraa
main to us shakhs se nafrat bhi nahin kar saktaa

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

hoshiyaari dil-e-naadaan bahut kartaa hai
ranj kam sahtaa hai elaan bahut kartaa hai

har taraf chhaa gae paighaam-e-mohabbat ban kar
mujh se achchhi rahi qismat mere afsaanon ki

kuchh der to is aql ko aaraam diyaa jaae
ai ishq tujhe aaj koi kaam diyaa jaae

mujh ko maalum hai anjaam-e-mohabbat kyaa hai
ek din maut ki ummid pe jiinaa hogaa