nafraton kaa ilaaj karnaa hai — Mahwar Sirsivi

vo apne ‘abd-e-haqiqi ko aazmaataa hai
har ik bashar kaa yahaan imtihaan nahin hotaa

vaqt ke paanv bhi nahin mehvar
aur raftaar bhi ghazab ki hai

ghaur se dekhnaa hanste hue chehre ki taraf
ek manzar pas-e-manzar kai manzar degaa

aaj gar bole nahin haq baat par
kal sitam honge tumhaari zaat par

ulfat to dekhiye miri didaar ke sabab
darvesh ban ke yaar ki chaukhaT pe aa gayaa

ek muddat se niind taari hai
ek muddat se so nahin paae

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

husn jalva dikhaa gayaa apnaa
ishq baiThaa rahaa udaas kahin

yahin kahin pe adu ne paDaav Daalaa thaa
yahin kahin pe mohabbat ne haar maani thi

vo ishq jis ki zamaane ko bhi khabar na rahi
tire bichhaDne se rusvaa nagar nagar mein rahaa

hamaare ishq mein rusvaa hue tum
magar ham to tamaashaa ho gae hain