vo ishq jis ki zamaane ko bhi khabar na rahi — Athar Nadir

aadmi kaa amal se rishta hai
kaam aataa nahin nasab kuchh bhi

kis darja mire shahr ki dilkash hai fazaa bhi
maanus har ik chiiz hai miTTi bhi havaa bhi

dekho to har ik rang se miltaa hai miraa rang
socho to har ik baat hai auron se judaa bhi

raat aangan mein chaand utraa thaa
tum mile the ki khvaab dekhaa thaa

gham-gusaari ke liye ab nahin aataa hai koi
zakhm bhar jaane kaa imkaan na huaa thaa so huaa

jo dekhiye to zamaana hai tez-rau kitnaa
tulu-e-subh abhi hai to vaqt-e-shaam abhi

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

thak gayaa hai dil-e-vahshi miraa fariyaad se bhi
ji bahaltaa nahin ai dost tiri yaad se bhi

husn jalva dikhaa gayaa apnaa
ishq baiThaa rahaa udaas kahin

vo jo pahlaa thaa apnaa ishq vahi
aakhiri vaardaat thi dil ki