suluk rakhtaa hai mujh se munaafiqon jaisaa — Masood Tanha

bahut khaamosh rahtaa hai jo 'tanhaa'
vo mahfil mein baraabar boltaa hai

bazm-e-yaaraan mein baiThtaa huun magar
meri jaanib harif dekhte hain

shahr mein raunaqein sahi 'tanhaa'
apne gaanv se mat kinaaraa kar

dost hi khubiyaan bataate hain
dost hi khaamiyaan nikaalte hain

ye tamaashaa sar-e-baazaar nahin ho saktaa
har koi meraa kharidaar nahin ho saktaa

yaadon ke qaafile mein udaasi thi ham-rikaab
hijrat mein tere shahr se 'tanhaa' nahin gae

mere khvaabon ke jharokon ko sajaate rahiye
na sahi vasl magar yaad to aate rahiye

naam meraa yaad karke chuskiyon ke biich mein
kyaa hui hai chaae ke cup mein tire halchal kabhi

kabhi kabhi tu mujhe yaad kar to leti hai
sukun itnaa saa kaafi hai zindagi ke liye

qindil-e-mah-o-mehr kaa aflaak pe honaa
kuchh is se ziyaada hai miraa khaak pe honaa

har taraf ziist ki raahon mein kaDi dhuup hai dost
bas tiri yaad ke saae hain panaahon ki tarah

jaane kis ki thi khataa yaad nahin
ham hue kaise judaa yaad nahin