bichhaDne vaalon mein ham jis se aashnaa kam the — Mohsin Zaidi

agar chaman kaa koi dar khulaa bhi mere liye
sumum ban gai baad-e-sabaa bhi mere liye

koi kashti mein tanhaa jaa rahaa hai
kisi ke saath dariyaa jaa rahaa hai

koi akelaa to main saadgi-pasand na thaa
pasand us ne bhi rangon mein rang saada kiyaa

duur rahnaa thaa jab us ko 'mohsin'
mere nazdik vo aayaa kyuun thaa

jaise do mulkon ko ik sarhad alag karti hui
vaqt ne khat aisaa khinchaa mere us ke darmiyaan

tiir o kamaan aap bhi 'mohsin' sambhaaliye
jab dosti ki aaD mein khanjar dikhaai de

mere khvaabon ke jharokon ko sajaate rahiye
na sahi vasl magar yaad to aate rahiye

sab ko ham bhuul gae josh-e-junun mein lekin
ik tiri yaad thi aisi jo bhulaai na gai

tujhe maalum hai in phephaDon mein zakhm aae hain
tiri yaadon ki ik nannhi si chingaari bachaane mein

rang-e-dil rang-e-nazar yaad aayaa
tere jalvon kaa asar yaad aayaa

baDi mushkil se bahlaayaa thaa khud ko
achaanak yaad teri aa gai phir

tu nahin paas tiri yaad to hai
tu hi to sujhe jahaan tak sochun