tiir o kamaan aap bhi 'mohsin' sambhaaliye — Mohsin Zaidi

agar chaman kaa koi dar khulaa bhi mere liye
sumum ban gai baad-e-sabaa bhi mere liye

koi kashti mein tanhaa jaa rahaa hai
kisi ke saath dariyaa jaa rahaa hai

koi akelaa to main saadgi-pasand na thaa
pasand us ne bhi rangon mein rang saada kiyaa

duur rahnaa thaa jab us ko 'mohsin'
mere nazdik vo aayaa kyuun thaa

jaise do mulkon ko ik sarhad alag karti hui
vaqt ne khat aisaa khinchaa mere us ke darmiyaan

libaas badle nahin ham ne mausamon ki tarah
ki zeb-e-tan jo kiyaa ek hi labaada kiyaa

jab ki pahlu se yaar uThtaa hai
dard be-ikhtiyaar uThtaa hai

ab aadmi kuchh aur hamaari nazar mein hai
jab se sunaa hai yaar libaas-e-bashar mein hai

kaanTe se bhi nichoD li ghairon ne bu-e-gul
yaaron ne bu-e-gul se bhi kaanTaa banaa diyaa

aql kahti hai dobaara aazmaanaa jahl hai
dil ye kahtaa hai fareb-e-dost khaate jaaiye

aaina khud bhi sanvartaa thaa hamaari khaatir
ham tire vaaste tayyaar huaa karte the

ye vaqt kaifiyaat se bhartaa nahin kabhi
ye jaam ikhtiyaar nahin kar rahaa huun main