koi akelaa to main saadgi-pasand na thaa — Mohsin Zaidi

agar chaman kaa koi dar khulaa bhi mere liye
sumum ban gai baad-e-sabaa bhi mere liye

koi kashti mein tanhaa jaa rahaa hai
kisi ke saath dariyaa jaa rahaa hai

duur rahnaa thaa jab us ko 'mohsin'
mere nazdik vo aayaa kyuun thaa

jaise do mulkon ko ik sarhad alag karti hui
vaqt ne khat aisaa khinchaa mere us ke darmiyaan

tiir o kamaan aap bhi 'mohsin' sambhaaliye
jab dosti ki aaD mein khanjar dikhaai de

libaas badle nahin ham ne mausamon ki tarah
ki zeb-e-tan jo kiyaa ek hi labaada kiyaa

dekh kar meraa dasht-e-tanhaai
rang-e-ru-e-bahaar utraa hai

ghalat hai aap na the ham-kalaam khalvat mein
adu se aap ki tasvir bolti hogi

jab khudaa bhi nahin thaa saath mare
mujh pe biiti hai aisi tanhaai

jo tiir aayaa gale mil ke dil se lauT gayaa
vo apne fan mein main apne hunar mein tanhaa thaa

ye tanhaa raat ye gahri fazaaein
use DhunDein ki us ko bhuul jaaein

raasta sunsaan thaa to muD ke dekhaa kyuun nahin
mujh ko tanhaa dekh kar us ne pukaaraa kyuun nahin