dil ek hai to kai baar kyuun lagaayaa jaae — Moin Shadab

kisi ko dil se bhulaane mein der lagti hai
ye kapDe kamre ke andar sukhaane paDte hain

sardi aur garmi ke uzr nahin chalte
mausam dekh ke saahab ishq nahin hotaa

nae tarz ki colony mein sab kuchh ek saa hai
apnaa ghar bhi haath baDi mushkil se aataa hai

umr bhar ko miraa honaa bhi nahin chaahtaa vo
mujh ko aasaani se khonaa bhi nahin chaahtaa vo

tum sharaafat kahaan baazaar mein le aae ho
ye vo sikka hai jo barson se nahin chaltaa hai

us se milne ki khushi baa'd mein dukh deti hai
jashn ke baa'd kaa sannaaTaa bahut khaltaa hai

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

husn jalva dikhaa gayaa apnaa
ishq baiThaa rahaa udaas kahin

taDapnaa gungunaanaa aah bharnaa dasht-paimaai
dil-e-shaair ki kuchh ranginiyaan hain mere hisse mein

ishq mein bu hai kibriyaai ki
aashiqi jis ne ki khudaai ki

ishq ne mansab likhe jis din miri taqdir mein
daagh ki naqadi mili sahraa milaa jaagir mein