kisi ko dil se bhulaane mein der lagti hai — Moin Shadab

sardi aur garmi ke uzr nahin chalte
mausam dekh ke saahab ishq nahin hotaa

dil ek hai to kai baar kyuun lagaayaa jaae
bas ek ishq bahut hai agar nibhaayaa jaae

nae tarz ki colony mein sab kuchh ek saa hai
apnaa ghar bhi haath baDi mushkil se aataa hai

umr bhar ko miraa honaa bhi nahin chaahtaa vo
mujh ko aasaani se khonaa bhi nahin chaahtaa vo

tum sharaafat kahaan baazaar mein le aae ho
ye vo sikka hai jo barson se nahin chaltaa hai

us se milne ki khushi baa'd mein dukh deti hai
jashn ke baa'd kaa sannaaTaa bahut khaltaa hai

main baDaa ho gayaa huun magar bachpanaa
mere dil se kabhi bhi gayaa hi nahin

badalte vaqt ne badle mizaaj bhi kaise
tiri adaa bhi gai meraa baankpan bhi gayaa

'saif' andaaz-e-bayaan rang badal detaa hai
varna duniyaa mein koi baat nai baat nahin

main kyunkar na rakhkhun aziiz apne dil ko
kahin dil saa bhi yaar paidaa huaa hai

khaaveinge Taanke zakhm-e-sar-o-ru par ai tabib
par zakhm-e-dil to ham se silaayaa na jaaegaa

dil apnaa kahin Thahre to ham bhi kahin Thahrein
is kuche mein aa rahnaa us kuche mein jaa rahnaa