kyaa khabar kab qaid-e-baam-o-dar se uktaa jaae dil — Mubarak Shamim

nazar aati nahin hain kam-nazar ko
saraabon ke jigar mein naddiyaan hain

muddat guzri Duub chukaa huun dard ki pyaasi lahron mein
zinda huun ye koi na jaane saans ke aane jaane se

tumhaari yaad ke saae bhi kuchh simaT se gae
ghamon ki dhuup to baahar thi aks andar thaa

jo saaya-daar shajar the vo sarf-e-daar hue
dikhaai dete nahin duur duur tak saae

bol kis moD pe huun kashmakash-e-marg-o-hayaat
aise aalam mein kahaan chhoD diyaa hai mujh ko

us ko dhundlaa na sakegaa kabhi lamhon kaa ghubaar
meri hasti kaa varaq yunhi khulaa rahne de

main baDaa ho gayaa huun magar bachpanaa
mere dil se kabhi bhi gayaa hi nahin

khudaa ke haath mein mat saunp saare kaamon ko
badalte vaqt pe kuchh apnaa ikhtiyaar bhi rakh

barsaat kaa baadal to divaana hai kyaa jaane
kis raah se bachnaa hai kis chhat ko bhigonaa hai

na ho ehsaas to saaraa jahaan hai be-his-o-murda
gudaaz-e-dil ho to dukhti ragein milti hain patthar mein

thak gayaa hai dil-e-vahshi miraa fariyaad se bhi
ji bahaltaa nahin ai dost tiri yaad se bhi

badalte vaqt ne badle mizaaj bhi kaise
tiri adaa bhi gai meraa baankpan bhi gayaa