dil hi dil mein yaan mohabbat apnaa ghar karti rahi — Mushafi Ghulam Hamdani

ham bhi ai jaan-e-man itne to nahin naakaara
kabhi kuchh kaam tu ham ko bhi to farmaayaa kar

jitnaa ki ye duniyaa mein hamein khvaar rakhe hai
itne to gunahgaar zamaane ke nahin ham

sach ishq mein hain aashiq o maashuq baraabar
jo mushkil-e-majnun hai so hai mushkil-e-lailaa

lailaa chali thi haj ke liye jazb-e-ishq se
naaqa machal ke najd ki manzil mein rah gayaa

apni to is chaman mein nit umr yunhi guzri
yaan aashiyaan banaayaa vaan aashiyaan banaayaa

pichhaa kisi tarah ye miraa chhoDtaa nahin
haathon se ishq ke koi jaave kahaan nikal

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

husn jalva dikhaa gayaa apnaa
ishq baiThaa rahaa udaas kahin

chaahiye thi shama is taarik ghar ke vaaste
khaana-e-dil mein charaagh-e-ishq raushan ho gayaa

mohabbat vo hai jis mein kuchh kisi se ho nahin saktaa
jo ho saktaa hai vo bhi aadmi se ho nahin saktaa

but-khaane ki ulfat hai na kaabe ki mohabbat
juyaai-e-nairang hai jab tak ki nazar hai