koi saughaat-e-vafaa de ke chalaa jaaungaa — Muzaffar Razmi

ye jabr bhi dekhaa hai taarikh ki nazron ne
lamhon ne khataa ki thi sadiyon ne sazaa paai

khud pukaaregi jo manzil to Thahar jaaungaa
varna khuddaar musaafir huun guzar jaaungaa

mere maahaul mein har samt bure log nahin
kuchh bhale bhi mire hamraah chale aate hain

is raaz ko kyaa jaanein saahil ke tamaashaai
ham Duub ke samjhe hain dariyaa tiri gahraai

mujh ko haalaat mein uljhaa huaa rahne de yunhi
main tiri zulf nahin huun jo sanvar jaaungaa

mere daaman mein agar kuchh na rahegaa baaqi
agli naslon ko duaa de ke chalaa jaaungaa

duur ho kar bhi sunin tum ne hikaayaat-e-vafaa
qurb mein bhi vahi unvaan hai qarib aa jaao

nahin maalum kitne ho chuke hain imtihaan ab tak
magar tere vafaadaaron ki himmat hai javaan ab tak

umr bhar us ne bevafaai ki
umr se bhi vo baa-vafaa na rahaa

dekh saktaa huun binaa chashme ke main
dost teri bevafaai saaf saaf

bazm-e-vafaa saji to ajab silsile hue
shikve hue na un se na ham se gile hue

hai dil mein agar us se mohabbat kaa iraada
le lijiye dushman ke liye ham se vafaa qarz