vahi rishte vahi naate vahi gham — Najeeb Ahmad

khema-e-jaan ki tanaabon ko ukhaD jaanaa thaa
ham se ik roz tiraa gham bhi bichhaD jaanaa thaa

kis ne vafaa ke naam pe dhokaa diyaa mujhe
kis se kahun ki meraa gunahgaar kaun hai

maut se ziist ki takmil nahin ho sakti
raushni khaak mein tahlil nahin ho sakti

phir yuun huaa ki mujh pe hi divaar gir paDi
lekin na khul sakaa pas-e-divaar kaun hai

ik tiri yaad gale aise paDi hai ki 'najib'
aaj kaa kaam bhi ham kal pe uThaa rakhte hain

zamin pe paanv zaraa ehtiyaat se dharnaa
ukhaD gae to qadam phir kahaan sambhalte hain

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

gham ki band muTThi mein ret saa miraa jivan
jab zaraa kasi muTThi zindagi bikharti hai

kuchh badan ki zabaan kahti thi
aansuon ki zabaan mein thaa kuchh

tanhaaiyaan safar mein musalsal bani rahin
phir bhi tumhaaraa naam pukaare chale gae