gham ki band muTThi mein ret saa miraa jivan — Ateeq Anzar

use dekhne ki thi aarzu mujhe us ki thi baDi justuju
magar us ke aariz-e-naaz pe miri har nigaah phisal gai

shaam ke dhundlakon mein Dubtaa hai yuun suraj
jaise aarzu koi mere dil mein marti hai

bichhaDte vaqt anaa darmiyaan thi varna
manaanaa donon ne ik dusre ko chaahaa thaa

gaanv ke parinde tum ko kyaa pataa bideson mein
raat ham akelon ki kis tarah guzarti hai

tujh se mil kar bhi udaasi nahin jaati dil ki
tu nahin aur koi meri kami ho jaise

kisi ne bhejaa hai khat pyaar aur vafaa likh kar
qalam se kaam diyaa hai mujhe khudaa likh kar

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

hazaar dard sameTe hue huun ik dil mein
bikhar gai jo miri daastaan to kyaa hogaa

soch lo kal kahin aansu na bahaane paD jaaein
khuun kaa kyaa hai ragon mein vo yunhi khaultaa hai

udaas shaam ki yaadon bhari sulagti havaa
hamein phir aaj puraane dayaar le aai