vafaa ki raah mein dil kaa sipaas rakh dungaa — Nashir Naqvi

safar kaa khaatma hotaa nahin kahin apnaa
har ik paDaav se ik ibtidaa nikalti hai

jaane kab kaun se lamhe mein zarurat paD jaae
tum hamaare liye pahle se duaa kar rakhnaa

us ke karam kaa ek sahaaraa jo mil gayaa
phir umr bhar kisi ki zarurat nahin hui

main baDaa ho gayaa huun magar bachpanaa
mere dil se kabhi bhi gayaa hi nahin

unhein apne dil ki khabrein mire dil se mil rahi hain
main jo un se ruuTh jaaun to payaam tak na pahunche

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

khudaa ke haath mein mat saunp saare kaamon ko
badalte vaqt pe kuchh apnaa ikhtiyaar bhi rakh

chaand ne taan li hai chaadar-e-abr
ab vo kapDe badal rahi hogi

havaa shaakhon mein rukne aur ulajhne ko hai is lamhe
guzarte baadalon mein chaand haail hone vaalaa hai