ye haqiqat hai ki ahbaab ko ham — Nasir Kazmi

kuchh yaadgaar-e-shahr-e-sitamgar hi le chalein
aae hain is gali mein to patthar hi le chalein

vo raat kaa be-navaa musaafir vo teraa shaair vo teraa 'naasir'
tiri gali tak to ham ne dekhaa thaa phir na jaane kidhar gayaa vo

akele ghar se puchhti hai be-kasi
tiraa diyaa jalaane vaale kyaa hue

girafta-dil hain bahut aaj tere divaane
khudaa kare koi tere sivaa na pahchaane

jurm-e-ummid ki sazaa hi de
mere haq mein bhi kuchh sunaa hi de

nae kapDe badal kar jaaun kahaan aur baal banaaun kis ke liye
vo shakhs to shahr hi chhoD gayaa main baahar jaaun kis ke liye

mere khvaabon ke jharokon ko sajaate rahiye
na sahi vasl magar yaad to aate rahiye

sab ko ham bhuul gae josh-e-junun mein lekin
ik tiri yaad thi aisi jo bhulaai na gai

yaadon ki mahfil mein kho kar
dil apnaa tanhaa tanhaa hai

yaad-e-yaaraan dil mein aai huuk ban kar rah gai
jaise ik zakhmi parinda jis ke par TuuTe hue

teri yaadon ki chamakti hui mashal ke sivaa
meri aankhon mein koi aur ujaalaa hi nahin

koi khayaal koi yaad koi to ehsaas
milaa de aaj zaraa aa ke ham ko khud ham se