kuchh na thaa mere paas khone ko — Nomaan Shauque

is baar intizaam to sardi kaa ho gayaa
kyaa haal peD kaTte hi basti kaa ho gayaa

vo saanp jis ne mujhe aaj tak Dasaa bhi nahin
tamaam zahr sukhan mein mire usi kaa hai

phir is mazaaq ko jamhuriyat kaa naam diyaa
hamein Daraane lage vo hamaari taaqat se

apni aahaT pe chaunktaa huun main
kis ki duniyaa mein aa gayaa huun main

vo tanz ko bhi husn-e-talab jaan khush hue
ulTaa paDhaa gayaa, miraa paighaam aur thaa

bas tire aane ki ik afvaah kaa aisaa asar
kaise kaise log the bimaar achchhe ho gae

hijr mein bigDi hai apni shakl yuun
dekh kar aaina Dar jaataa huun main

rozi-rasaan khudaa hai fikr-e-maaash mat kar
is khaar kaa tu dil mein khauf-e-kharaash mat kar

isi khanDar mein mire khvaab ki gali bhi thi
gali mein peD bhi thaa peD par samar bhi thaa

aasmaan aisaa bhi kyaa khatra thaa dil ki aag se
itni baarish ek shole ko bujhaane ke liye

us imaarat ko giraa do jo nazar aati hai
mire andar jo khanDar hai use taamir karo

ham aur chaah ghair ki allaah se Daro
milte hain tum se bhi to tumhaari khushi se ham