ham ko bharam ne bahr-e-tavahhum banaa diyaa — Pandit Jawahar Nath Saqi

apne junun-kade se nikaltaa hi ab nahin
saaqi jo mai-farosh sar-e-rahguzaar thaa

falak pe chaand sitaare nikalte hain har shab
sitam yahi hai nikaltaa nahin hamaaraa chaand

vo maah jalva dikhaa kar hamein huaa ru-posh
ye aarzu hai ki nikle kahin dobaaraa chaand

qaalib ko apne chhoD ke maqlub ho gae
kyaa aur koi qalb hai is inqalaab mein

nahin khultaa sabab tabassum kaa
aaj kyaa koi bosa deinge aap

jazba-e-ishq chaahiye suufi
jo hai afsurda ahl-e-haal nahin

mujid jo nuur kaa hai vo meraa charaagh hai
parvaana huun main anjuman-e-kaaenaat kaa

achchhi misaal bantin zaahir agar vo hotin
in nekiyon ko ham to dariyaa mein Daal aae

ek pardaa hai sirf saanson kaa
saans Thahre to kaaenaat khule

dam bhar rahe habaab-e-namat kaaenaat mein
is zindagi mein naam nahin maah-o-saal kaa

farz hai dariyaa-dilon par khaaksaaron ki madad
farsh sahraa ke liye laazim huaa sailaab kaa

vaae aashiq-e-naadaan kaaenaat ye teri
ik shikasta shishe ko dil banaae baiThaa hai