divaaron se mil kar ronaa achchhaa lagtaa hai — Qaisarul Jafri

ghar lauT ke roeinge maan baap akele mein
miTTi ke khilaune bhi saste na the mele mein

zindagi bhar ke liye ruuTh ke jaane vaale
main abhi tak tiri tasvir liye baiThaa huun

havaa khafaa thi magar itni sang-dil bhi na thi
hamin ko shama jalaane kaa hausla na huaa

kitne dinon ke pyaase honge yaaro socho to
shabnam kaa qatra bhi jin ko dariyaa lagtaa hai

tu is tarah se mire saath bevafaai kar
ki tere baa'd mujhe koi bevafaa na lage

tumhaare shahr kaa mausam baDaa suhaanaa lage
main ek shaam churaa luun agar buraa na lage

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

kahaan milegi misaal meri sitamgari ki
ki main gulaabon ke zakhm kaanTon se si rahaa huun

gul kiyaa jis ne vo thaa aur magar
shama ne shikva havaaon se kiyaa

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

gulshan-parast huun mujhe gul hi nahin aziiz
kaanTon se bhi nibaah kiye jaa rahaa huun main

fasl-e-gul aate hi vahshat ho gai
phir vahi apni tabiat ho gai