haalaat se khauf khaa rahaa huun — Qateel Shifai

abhi to baat karo ham se doston ki tarah
phir ikhtilaaf ke pahlu nikaalte rahnaa

aakhri hichki tire zaanun pe aae
maut bhi main shaairaana chaahtaa huun

apne haathon ki lakiron mein sajaa le mujh ko
main huun teraa tu nasib apnaa banaa le mujh ko

nikal kar dair-o-kaaba se agar miltaa na but-khaana
to Thukraae hue insaan khudaa jaane kahaan jaate

kyuun sharik-e-gham banaate ho kisi ko ai 'qatil'
apni suuli apne kaandhe par uThaao chup raho

ab jis ke ji mein aae vahi paae raushni
ham ne to dil jalaa ke sar-e-aam rakh diyaa

laDkhaDaa kar gir paDi unchi imaarat dafatan
dafatan taamir ki kursi pe khanDar jam gayaa

milaa hai takht jo jamhuriyat mein bandar ko
to un se kyaa sabhi jangal ke sher Dar jaaein

ban ke leader so rahe to zindagi kis kaam ki
amn qaaem ho gayaa to leaderi kis kaam ki

main teri jumbish-e-mizhgaan se kaanp jaataa hon
agarche dil ko gham-e-do-jahaan se Dar bhi nahin

ik khauf-zada saa shakhs ghar tak
pahunchaa kai raaston mein baT kar

khatra thaa aandhiyon se magar haae-re nasib
baad-e-sabaa charaagh bujhaa kar chali gai