bulandi ke liye bas apni hi nazron se girnaa thaa — Rajesh Reddy

kiyaa ijaad jis ne bhi khudaa ko
vo khud ko kaise bahlaataa thaa pahle

saath 'ghaalib' ke gai fikr ki gahraai bhi
aur lahja bhi gayaa 'mir-taqi-mir' ke saath

sab log is se pahle ki devtaa samajhte
ham ne zaraa saa khud ko insaan kar liyaa hai

kyaa jaane kis jahaan mein milegaa hamein sukun
naaraaz hain zamin se khafaa aasmaan se ham

justuju kaa ik ajab silsila taa-umr rahaa
khud ko khonaa thaa kahin aur kahin DhunDhnaa thaa

kaun paDhtaa hai yahaan khol ke ab dil ki kitaab
ab to chehre ko hi akhbaar kiyaa jaanaa hai

mere khvaabon ke jharokon ko sajaate rahiye
na sahi vasl magar yaad to aate rahiye

mere siine se nikaalo miri buniyaad ki jaan
itni aasaani se viraan nahin hotaa main

ye ajnabi si manzilein aur raftagaan ki yaad
tanhaaiyon kaa zahr hai aur ham hain dosto

ajnabi mujh se aa gale mil le
aaj ik dost yaad aae mujhe

lobaan mein chingaari jaise koi rakh jaae
yuun yaad tiri shab bhar siine mein sulagti hai

dil to lete ho magar ye bhi rahe yaad tumhein
jo hamaaraa na huaa kab vo tumhaaraa hogaa