paas-e-aadaab-e-vafaa thaa ki shikasta-paai — Raza Hamdani

bikhar gayaa huun fazaaon mein bu-e-gul ki tarah
mire vajud mein vusat miri samaa na saki

bhanvar se laDo tund lahron se uljho
kahaan tak chaloge kinaare kinaare

ik baar jo TuuTe to kabhi juD nahin saktaa
aaina nahin dil magar aaina-numaa hai

taana dete ho mujhe jiine kaa
zindagi meri khataa ho jaise

goyaa the to koi bhi nahin thaa
ab chup hain to shahr dekhtaa hai

qurbat tiri kis ko raas aai
aaine mein aks kaanptaa hai

kyon tasavvur mein ji rahaa huun main
jab haqiqat mein mar hi jaanaa hai

apni anaa ki aaj bhi taskin ham ne ki
ji bhar ke us ke husn ki tauhin ham ne ki

kam-zarf mezbaan ki daa'vat nahin qubul
thoDi bahut pilaa ke jataanaa hai baar baar

kis kaam ki aisi sachchaai jo toD de ummidein dil ki
thoDi si tasalli ho to gai maanaa ki vo bol ke jhuuT gayaa

khudaa-parasti kaa biij bo kar khudi kaa dil mein farogh dekho
yahin se jhuTe khudaa uge hain baDi khatarnaak ye zamin hai

maanaa ki is zamin ko na gulzaar kar sake
kuchh khaar kam to kar gae guzre jidhar se ham