in mein kyaa farq hai ab is kaa bhi ehsaas nahin — S A Mehdi

jins-e-vafaa kaa dahr mein baazaar gir gayaa
jab ishq faiz-e-husn kaa haamil nahin rahaa

mustaqil ab bujhaa bujhaa saa hai
aakhir is dil ko ye huaa kyaa hai

donon hon kaise ek jaa 'mehdi' surur-o-soz-e-dil
barq-e-nigaah-e-naaz ne gir ke bataa diyaa ki yuun

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

ghamza bhi ho saffaak nigaahein bhi hon khun-rez
talvaar ke baandhe se to qaatil nahin hotaa

gham azizon kaa hasinon ki judaai dekhi
dekhein dikhlaae abhi gardish-e-dauraan kyaa kyaa