aap ke lab pe aur vafaa ki qasam — Saba Akbarabadi

ravaan hai qaafila-e-ruh-e-iltifaat abhi
hamaari raah se haT jaae kaaenaat abhi

kaun uThaae ishq ke anjaam ki jaanib nazar
kuchh asar baaqi hain ab tak hairat-e-aaghaaz ke

musaafiraan-e-rah-e-shauq sust-e-gaam ho kyuun
qadam baDhaae hue haan qadam baDhaae hue

apne jalne mein kisi ko nahin karte hain sharik
raat ho jaae to ham shama bujhaa dete hain

samjhegaa aadmi ko vahaan kaun aadmi
banda jahaan khudaa ko khudaa maantaa nahin

gham-e-dauraan ko baDi chiiz samajh rakkhaa thaa
kaam jab tak na paDaa thaa gham-e-jaanaan se hamein

be-muravvat ho bevafaa ho tum
apne matlab ke aashnaa ho tum

umr bhar yaad rahaa apni vafaaon ki tarah
ek vo ahd jise aap ne puuraa na kiyaa

abhi tufaan kaa rukh garche mire pahlu ki jaanib hai
tiri aaghosh mein barpaa koi mahshar bhi dekhungaa

chupke se sah rahaa huun sitam tere bevafaa
meri khataa to jab ho ki chuun kar rahaa huun main

sahaaraa na deti agar mauj-e-tufaan
Dubo hi diyaa thaa hamein naa-khudaa ne

saans rukti hai chhalakte hue paimaane mein
koi letaa thaa tiraa naam-e-vafaa aakhir-e-shab