gham-e-dauraan ko baDi chiiz samajh rakkhaa thaa — Saba Akbarabadi

kaun uThaae ishq ke anjaam ki jaanib nazar
kuchh asar baaqi hain ab tak hairat-e-aaghaaz ke

musaafiraan-e-rah-e-shauq sust-e-gaam ho kyuun
qadam baDhaae hue haan qadam baDhaae hue

aap ke lab pe aur vafaa ki qasam
kyaa qasam khaai hai khudaa ki qasam

apne jalne mein kisi ko nahin karte hain sharik
raat ho jaae to ham shama bujhaa dete hain

samjhegaa aadmi ko vahaan kaun aadmi
banda jahaan khudaa ko khudaa maantaa nahin

ravaan hai qaafila-e-ruh-e-iltifaat abhi
hamaari raah se haT jaae kaaenaat abhi

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

tu dekh lenaa hamaare bachchon ke baal jaldi safed honge
hamaari chhoDi hui udaasi se saat naslein udaas hongi

aisi tasvir banaa rote hue khush bhi lagun
gham ki tarsil to ho gham kaa tamaasha na bane

sach hai in donon kaa hai ik aalam
meri tanhaai teri yaktaai