tum ko jiine ke bhi aate nahin atvaar magar — Saddam Husain Muzmar

nashtar-e-'mir' hain tiri baatein
phuljhaDi-vuljhaDi nahin jaanaan

ab to khvaahish bhi yahi hai ki hamaare hisse
hijr aayaa hai faqat hijr hi aataa jaae

mauj-e-dariyaa kaa koi khauf nahin hai lekin
hain tabi'at pe giraan-baar kinaare is ke

phuul lagte hain zaraa der se avval avval
shaakh-e-gul par bhi miyaan khaar hi lagte hain naa

ek khitte mein rahaa pyaas kaa 'aalam barpaa
ek khitte mein bahut TuuT ke barsaa paani

main tishna-labi par bhi rahaa khush ki miraa zarf
khaali hai magar soch se logon ki baDaa hai

yaar bhi raah ki divaar samajhte hain mujhe
main samajhtaa thaa mire yaar samajhte hain mujhe

jab ki pahlu se yaar uThtaa hai
dard be-ikhtiyaar uThtaa hai

baad marne ke bhi armaan yahi hai ai dost
ruuh meri tire aaghosh-e-mohabbat mein rahe

ye tamaashaa-e-ilm-o-hunar dosto
kuchh nahin hai faqat kaaghzi vahm hai

tu dard bhi duaa bhi tu zakhm bhi davaa bhi
shikve bhi hain tujhi se aur pyaar bhi tujhi se

aaj-kal kirdaar kaa meaar bhi daulat se hai
itni sasti ho gai dastaar-o-daanaai ki bas