nashtar-e-'mir' hain tiri baatein — Saddam Husain Muzmar

ab to khvaahish bhi yahi hai ki hamaare hisse
hijr aayaa hai faqat hijr hi aataa jaae

mauj-e-dariyaa kaa koi khauf nahin hai lekin
hain tabi'at pe giraan-baar kinaare is ke

phuul lagte hain zaraa der se avval avval
shaakh-e-gul par bhi miyaan khaar hi lagte hain naa

tum ko jiine ke bhi aate nahin atvaar magar
ham ko marne ke bhi me'yaar samajh aate hain

ek khitte mein rahaa pyaas kaa 'aalam barpaa
ek khitte mein bahut TuuT ke barsaa paani

main tishna-labi par bhi rahaa khush ki miraa zarf
khaali hai magar soch se logon ki baDaa hai

apni anaa ki aaj bhi taskin ham ne ki
ji bhar ke us ke husn ki tauhin ham ne ki

kyon tasavvur mein ji rahaa huun main
jab haqiqat mein mar hi jaanaa hai

talaatum aarzu mein hai na tufaan justuju mein hai
javaani kaa guzar jaanaa hai dariyaa kaa utar jaanaa

pi liyaa karte hain jiine ki tamannaa mein kabhi
laDkhaDaanaa bhi zaruri hai sambhalne ke liye

ye lamha lamha takalluf ke TuTte rishte
na itne paas mire aa ki tu puraanaa lage

aql ne tark-e-taalluq ko ghanimat jaanaa
dil ko badle hue haalaat pe ronaa aayaa