phuul lagte hain zaraa der se avval avval — Saddam Husain Muzmar

nashtar-e-'mir' hain tiri baatein
phuljhaDi-vuljhaDi nahin jaanaan

ab to khvaahish bhi yahi hai ki hamaare hisse
hijr aayaa hai faqat hijr hi aataa jaae

mauj-e-dariyaa kaa koi khauf nahin hai lekin
hain tabi'at pe giraan-baar kinaare is ke

tum ko jiine ke bhi aate nahin atvaar magar
ham ko marne ke bhi me'yaar samajh aate hain

ek khitte mein rahaa pyaas kaa 'aalam barpaa
ek khitte mein bahut TuuT ke barsaa paani

main tishna-labi par bhi rahaa khush ki miraa zarf
khaali hai magar soch se logon ki baDaa hai

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

kahaan milegi misaal meri sitamgari ki
ki main gulaabon ke zakhm kaanTon se si rahaa huun

kaanTe se bhi nichoD li ghairon ne bu-e-gul
yaaron ne bu-e-gul se bhi kaanTaa banaa diyaa

zabaan-bandi ke mausam mein gali-kuchon ki mat puchho
parindon ke chahakne se shajar aabaad hote hain

dil par pahan liyaa hai vo gajre ke jaisaa shakhs
lekin gale kaa haar nahin kar rahaa huun main