jaan jaane ko hai aur raqs mein parvaana hai — Saghar Khayyami

chehre to jhurriyon se bhare dil javaan hain
din mein hain shaikh raat mein salmaan-khaan hain

ab aap hi bataaein vo kaise nibhaaegaa
jis ko nasib dum nahin vo kyaa hilaae gaa

ek qaidi subh ko phaansi lagaa kar mar gayaa
raat bhar ghazlein sunaain us ko thaanedaar ne

mahngaai ke zamaane mein bachchon ki rel-pel
aisaa na ho kamar tiri mahngaai toD de

hamaare laal ko darkaar hai vahi laDki
ki jis kaa baap police mein ho kam se kam deputy

kitne chehre lage hain chehron par
kyaa haqiqat hai aur siyaasat kyaa

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

ai chaaragaro paas tumhaare na milegi
bimaar-e-mohabbat ki davaa aur hi kuchh hai

tu jo talvaar se nahlaae lahu mein mujh ko
ghusl-e-sehhat huaa bhi ishq ki bimaari se

ishq binaai baDhaa detaa hai
jaane kyaa kyaa nazar aataa hai mujhe

agar hai duuri pe naaz tujh miri mohabbat mein bhi kashish hai
vahin tiraa aastaan milegaa jahaan jahaan sar jhukaaungaa main