raushni hai kisi ke hone se — Sagheer Malal

ghar ke baare mein yahi jaan sakaa huun ab tak
jab bhi lauTo koi darvaaza khulaa hotaa hai

un se bachnaa ki bichhaate hain panaahein pahle
phir yahi log kahin kaa nahin rahne dete

bas is khayaal se dekhaa tamaam logon ko
jo aaj aise hain kaise vo kal rahe honge

taajjub un ko hai kyuun meri khud-kalaami par
har aadmi kaa koi raaz-daan zaruri hai

ek lamhe mein zamaana huaa takhliq 'malaal'
vahi lamha hai yahaan aur zamaana hai vahi

ek rahne se yahaan vo maavaraa kaise huaa
sab se pahlaa aadmi khud se judaa kaise huaa

mere khvaabon ke jharokon ko sajaate rahiye
na sahi vasl magar yaad to aate rahiye

vaqt har zakhm ko bhar detaa hai kuchh bhi kiije
yaad rah jaati hai halki si chubhan ki had tak

vatan ke log sataate the jab vatan mein the
vatan ki yaad sataati hai jab vatan mein nahin

kisi ki yaad manaane mein iid guzregi
so shahr-e-dil mein bahut duur tak udaasi hai

aadhi se ziyaada shab-e-gham kaaT chukaa huun
ab bhi agar aa jaao to ye raat baDi hai

koi puraanaa khat kuchh bhuli-bisri yaad
zakhmon par vo lamhe marham hote hain