dasht o dar khair manaaein ki abhi vahshat mein — Saleem Ahmed

khush-numaa lafzon ki rishvat de ke raazi kijiye
ruuh ki tauhin par aamaada rahtaa hai badan

main gham ko basaa rahaa huun dil mein
be-ghar ko makaan de rahaa huun

ghar mein kuchh kam hai ye ehsaas bhi hotaa hai 'salim'
ye bhi khultaa nahin kis shai ki kami lagti hai

jaane andar kyaa huaa main shor sun kar ai 'salim'
us jagah pahunchaa to dekhaa band vo darvaaza thaa

ik aag si jalti rahi taa-umr lahu mein
ham apne hi ehsaas mein pakte rahe taa-der

jitnaa aankh se kam dekhun
utni duur dikhaai de

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

husn jalva dikhaa gayaa apnaa
ishq baiThaa rahaa udaas kahin

is ishq mein na puchho haal-e-dil-e-darida
tum ne sunaa to hogaa vo sher 'mushafi' kaa

kabhi na badle dil-e-baa-safaa ke taur-tariq
adu milaa to use bhi salaam karte rahe

ishq ik mashghala-e-jaan bhi to ho saktaa hai
kyaa zaruri hai ki aazaar kiyaa jaae use