aasmaan tu ne chhupaa rakkhaa hai suraj ko kahaan — Sardar Asif

aataa rahaa huun yaad main us ko tamaam umr
is zaaviye se ishq mein naakaam kab huaa

koi shikva nahin ham ko kisi se
khud apni zaat ham ko chhal rahi hai

ye kaise marhale mein phans gayaa hai meraa ghar maalik
agar chhat ko bachaa bhi luun to phir divaar jaati hai

sunaa hai dhuup ko ghar lauTne ki jaldi hai
vo aaj vaqt se pahle hi shaam kar degi

main tujh se jhuk ke milaa huun magar ye dhyaan rahe
baDaa nahin huun magar tujh se qad mein kam bhi nahin

ghazal kahne mein yuun to koi dushvaari nahin hoti
magar ik masala ye hai ki meyaari nahin hoti

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

gham hai na ab khushi hai na ummid hai na yaas
sab se najaat paae zamaane guzar gae

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

na jaane us ne khule aasmaan mein kyaa dekhaa
parinda phir se jahaan-e-qafas mein lauT aayaa