izhaar-e-muddaaa kaa iraada thaa aaj kuchh — Shad Azimabadi

iid mein iid hui aish kaa saamaan dekhaa
dekh kar chaand jo munh aap kaa ai jaan dekhaa

naazuk thaa bahut kuchh dil meraa ai 'shaad' tahammul ho na sakaa
ik Thes lagi thi yuun hi si kiyaa jald ye shisha TuuT gayaa

talab karein bhi to kyaa shai talab karein ai 'shaad'
hamein to aap nahin apnaa muddaaa maalum

dekhaa kiye vo mast nigaahon se baar baar
jab tak sharaab aai kai daur ho gae

dil-e-muztar se puchh ai raunaq-e-bazm
main khud aayaa nahin laayaa gayaa huun

jab kisi ne haal puchaa ro diyaa
chashm-e-tar tu ne to mujh ko kho diyaa

chalegaa tiir jab apni duaa kaa
kaleje dushmanon ke chhaan degaa

vo baDaa rahim o karim hai mujhe ye sifat bhi ataa kare
tujhe bhulne ki duaa karun to miri duaa mein asar na ho

bahut hi kam ko mili hain mohabbatein 'jaanif'
ziyaada-tar ko to mahbub ne du'aa di hai

zavaal-e-asr hai kuufe mein aur gadaagar hain
khulaa nahin koi dar baab-e-iltijaa ke sivaa

khaDaa huun zer-e-falak gumbad-e-sadaa mein 'munir'
ki jaise haath uThaa ho koi duaa ke liye

phirtaa hai mere dil mein koi harf-e-muddaaa
qaasid se kah do aur na jaae zaraa si der