jiite ji ham to gham-e-fardaa ki dhun mein mar gae — Shad Azimabadi

jab kisi ne haal puchaa ro diyaa
chashm-e-tar tu ne to mujh ko kho diyaa

iid mein iid hui aish kaa saamaan dekhaa
dekh kar chaand jo munh aap kaa ai jaan dekhaa

naazuk thaa bahut kuchh dil meraa ai 'shaad' tahammul ho na sakaa
ik Thes lagi thi yuun hi si kiyaa jald ye shisha TuuT gayaa

talab karein bhi to kyaa shai talab karein ai 'shaad'
hamein to aap nahin apnaa muddaaa maalum

dekhaa kiye vo mast nigaahon se baar baar
jab tak sharaab aai kai daur ho gae

izhaar-e-muddaaa kaa iraada thaa aaj kuchh
tevar tumhaare dekh ke khaamosh ho gayaa

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

daanista ham ne apne sabhi gham chhupaa liye
puchhaa kisi ne haal to bas muskuraa diye

shahr-e-dil ek muddat ujDaa basaa ghamon mein
aakhir ujaaD denaa us kaa qaraar paayaa