tabaah kar gai pakke makaan ki khvaahish — Shahid Kabir

is soch mein zindagi bitaa di
jaagaa huaa huun ki so rahaa huun

kaanTon ko pilaa ke khuun apnaa
raahon mein gulaab bo rahaa huun

be-sabab baat baDhaane ki zarurat kyaa hai
ham khafaa kab the manaane ki zarurat kyaa hai

mai-khaane ki baat na kar vaaiz mujh se
aanaa jaanaa teraa bhi hai meraa bhi

girne do tum mujhe miraa saaghar sambhaal lo
itnaa to mere yaar karo main nashe mein huun

zindagi ik aansuon kaa jaam thaa
pi gae kuchh aur kuchh chhalkaa gae

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

ab bhi barsaat ki raaton mein badan TuTtaa hai
jaag uThti hain ajab khvaahishein angDaai ki

bas ek pal ki tamannaa-e-vasl ki khaatir
tamaam 'umr lagaa di gai sanvarne mein

vaise kyaa ghaTiyaa si shai hai ye tamannaa kaa fareb
aap jaison ko bhi ham jaise taras jaate hain

ab mohabbat kaa sabab hai vahshat
varna hasrat to miTaa di gai hai

shab ko miri chashm-e-hasrat kaa sab dard-e-dil un se kah jaanaa
daanton mein dabaa kar honT apnaa kuchh soch ke us kaa rah jaanaa