'shaukat' hamaare saath baDaa haadisa huaa — Shaukat Wasti

baDe vasuq se duniyaa fareb deti rahi
baDe khulus se ham e'tibaar karte rahe

ajiib baat hai din bhar ke ehtimaam ke baad
charaagh ek bhi raushan huaa na shaam ke baad

ravish ravish pe chaman ke bujhe bujhe manzar
ye kah rahe hain yahaan se bahaar guzri hai

mujhe to ranj qabaa-haa-e-taar-taar kaa hai
khizaan se baDh ke gulon par sitam bahaar kaa hai

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

gham hai na ab khushi hai na ummid hai na yaas
sab se najaat paae zamaane guzar gae

na jaane us ne khule aasmaan mein kyaa dekhaa
parinda phir se jahaan-e-qafas mein lauT aayaa