koi duaa kabhi to hamaari qubul kar — Sheen Kaaf Nizam

vahshat to sang-o-khisht ki tartib le gai
ab fikr ye hai dasht ki vusat bhi le na jaae

nikle kabhi na ghar se magar is ke baavajud
apni tamaam umr safar mein guzar gai

darvaaza koi ghar se nikalne ke liye de
be-khauf koi raasta chalne ke liye de

chubhan ye piiTh mein kaisi hai muD ke dekh to le
kahin koi tujhe pichhe se dekhtaa hogaa

gali ke moD se ghar tak andheraa kyuun hai 'nizaam'
charaagh yaad kaa us ne bujhaa diyaa hogaa

udaasi akele mein Dar jaaegi
ghaDi-do-ghaDi ko khushi bhej de

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

gham hai na ab khushi hai na ummid hai na yaas
sab se najaat paae zamaane guzar gae

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

maarka garm to ho lene do khun-rezi kaa
pahle shamshir ke niche hamin jaa baiTheinge