apne ajdaad ki dastaar ko dekhaa aur phir — Sahar Alig

sharm-o-hayaa ne baaz rakhaa is qadar hamein
saayaa bhi un kaa dekh ke ham sar-nigun karein

main duniyaa chaahti huun na duniyaa ki rif'atein
meri talab najaat hai bas aur kuchh nahin

Dhal gai vasl ki shab Duub gayaa dil kaa charaagh
ab vahin baiThe rahein aap jahaan the baiThe

ek moti huun main moti bhi baDaa qimti huun
par vo moti jo abhi gum hai samundar mein kahin

shaahzaade hon vali hon ki sukhan-daan-e-shahr
jab vo dikhtaa hai koi aur kahaan dikhtaa hai

ye jabr hai 'izzat hai mohabbat hai ki kyaa hai
banti hi nahin aap se inkaar ki surat

main baDaa ho gayaa huun magar bachpanaa
mere dil se kabhi bhi gayaa hi nahin

khudaa ke haath mein mat saunp saare kaamon ko
badalte vaqt pe kuchh apnaa ikhtiyaar bhi rakh

badalte vaqt ne badle mizaaj bhi kaise
tiri adaa bhi gai meraa baankpan bhi gayaa

'saif' andaaz-e-bayaan rang badal detaa hai
varna duniyaa mein koi baat nai baat nahin

na ho ehsaas to saaraa jahaan hai be-his-o-murda
gudaaz-e-dil ho to dukhti ragein milti hain patthar mein

khirad ki rah jo chalaa main to dil ne mujh se kahaa
aziz-e-man ''ba-salaamat-ravi o baaz-aai''