safar safar mire qadmon se jagmagaayaa huaa — Sultan Akhtar

ik khauf-e-be-panaah hai aankhon ke aar-paar
taarikiyon mein Dubtaa lamha hai saamne

main vo sahraa jise paani ki havas le Duubi
tu vo baadal jo kabhi TuuT ke barsaa hi nahin

fursat mein rahaa karte hain fursat se zyaada
masruf hain ham log zarurat se zyaada

hamaari saada-mizaaji pe rashk karte hain
vo saada-posh jo be-intihaa rangile hain

saamne aankhon ke phir yakh-basta manzar aaegaa
dhuup jam jaaegi aangan mein december aaegaa

sab ke honTon pe munavvar hain hamaare qisse
aur ham apni kahaani bhi nahin jaante hain

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

safar mein aise kai marhale bhi aate hain
har ek moD pe kuchh log chhuT jaate hain

yuun to maujud apne ghar mein hai
aadmi mustaqil safar mein hai

yaar bhi raah ki divaar samajhte hain mujhe
main samajhtaa thaa mire yaar samajhte hain mujhe

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

manzilein samtein badalti jaa rahi hain roz o shab
is bhari duniyaa mein hai insaan tanhaa raah-rau