sune kyun-kar vo labbaik-e-haram ko — Taban Abdul Hai

havaa bhi ishq ki lagne na detaa main use hargiz
agar is dil pe hotaa haae kuchh bhi ikhtiyaar apnaa

buraa na maaniyo main puchhtaa huun ai zaalim
ki be-kason ke sataae se kuchh bhalaa bhi hai

aataa nahin vo yaar-e-sitamgar to kyaa huaa
koi gham to us kaa dil se hamaare judaa nahin

aaine ko tiri surat se na ho kyuun kar hairat
dar o divaar tujhe dekh ke hairaan hai aaj

imaan o diin se 'taabaan' kuchh kaam nahin hai ham ko
saaqi ho aur mai ho duniyaa ho aur ham hon

le meri khabar chashm mire yaar ki kyun-kar
bimaar ayaadat kare bimaar ki kyun-kar

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

furqat qubul rashk ke sadme nahin qubul
kyaa aaein ham raqib teri anjuman mein hai

abr-e-bahaar ab bhi jachtaa nahin nazar mein
kuchh aansuon ke qatre ab bhi hain chashm-e-tar mein

saaf qulqul se sadaa aati hai aamin aamin
apne saaqi ko jo ham rind duaa dete hain